गुरुवार, ४ सप्टेंबर, २००८

डोसा

जिन्नस
तांदुळ २ वाट्या (लाँग ग्रेन राइस)
उडदाची डाळ १ वाटी
चवीपुरते मीठ
मार्गदर्शन
२ वाट्या तांदुळ व १ वाटी डाळ दोन्ही वेगवेगळ्या पातेल्यात दुपारी १२ ला भिजत घालणे. रात्री १० ला मिक्सर/ब्लेंडर मधून बारीक वाटून घेणे. वाटून झालेले पीठ एका पातेल्यात झाकून ठेवणे. दुसऱ्या दिवशी सकाळी ९ वाजता न्याहरीला किंवा दुपारी १२ वाजता जेवायला डोसे करणे. दुसऱ्यादिवशी हे झाकून ठेवलेले पीठ फसफसून वर येते. आंबट होते.
आंबलेले इडली डोश्याचे पीठ तयार झाले की डोसे करायच्या वेळी हे आंबलेले पीठ चवीपुरते मीठ घालून व थोडे पाणी घालून डावेने चांगले घोटून घ्यावे. गंधासारखे एकसंध पीठ दिसले पाहिजे. डोश्याला पीठ हे नेहमी पातळच असावे म्हणजे डोसे तव्यावर घालताना मोठे पसरवता येतात. मध्यम आचेवर मोठा तवा चांगला तापवून घ्या. नंतर त्यावर १-२ चमचे तेल घालून कालथ्याने हे तेल सर्व तवाभर पसरून घ्या. एका वाटीत थोडे मीठ व पाणी घालून मीठाचे पाणी तयार करा. ते हाताने जरा ढवळून घ्या. नंतर तेल पसरलेल्या तव्यावर हे मीठाचे पाणी शिंपडा. चूर्र असा आवाज येईल. नंतर डोश्यासाठी घोटून तयार केलेले पीठ डावेने घेऊन ते तव्यावर घाला. काही सेकंद थांबा. मग हे पीठ गोल गोल जितके पसरवता येईल तितके पसरवा. मग परत काही सेकंद थांबा. नंतर १-२ चमचे तेल सर्व डोश्यावर पसरून घाला. डोश्याच्या कडेने पण तेल सोडा. हा पातळ डोसा अतिशय पातळ असल्याने काही वेळाने तो खालून ब्राउन रंगाचा झालेला दिसेल. आता कालथ्याने डोसा सर्व बाजूने सोडवून घ्या. मग त्यावर बटाट्याची भाजी घालून डाव्या व उजव्या बाजूने घडी घाला म्हणजे उपहारगृहात जसा डीश मध्ये देतात तसाच दिसेल. सोबत चटणी व गरम गरम, तिखट तिखट सांबार घ्या.
तेल फक्त एकदाच तव्यावर घातलेले पुरते. नंतर प्रत्येक डोशाच्या वेळी मीठाचे पाणी शिंपडा. बरेच डोसे घालायचे असतील तर ७-८ डोश्यानंतर परत एकदा थोडे तेल तव्यावर पसरून घ्यावे. ओल्या नारळाची चटणी व सांबार याची पाककृती मी मनोगतावर दिली आहे. त्यामुळे कोणाला मसाला डोसा करायचा असेल तर कृतीनुसार करता येईल.